سندويش كاساديا الدجاج المكسيكي حشو رائع وخبز طري ولا اروع :
العجينة :
كاس ماء دافئ +ملعقة حليب بودرة او (كاس غير ربع حليب ) +2 ملاعق كبار زيت +ملعقة كبيرة ماشي معمرة خميرة +ملعقة كبيرة سكر +2كؤوس فرينة + ملعقة صغيرة ملح ونمزج كلش حتى نتحصل على عجينة طرية ماتتلصقش في اليد ونعجنها حوالي 5د ونتركها تخمر .الحشو :
نصف صدر دجاج نقطعو مربعات +2 ملاعق زيت + ملعقة صغيرة خردل + ملعقة صغيرة هريسة او طماطم مصبرة +فلفل اسود+ راس الحانوت + كاري الدجاج +كركم + فلفل احمر +زنجبيل +ثوم بودرة او سنة ثوم + ملح نمزج كلش مع بعض
ونتركه يرتاح ساعة ونحضر الخبز
نقطع الطرشي فلفل اخضر واحمر او اصفر رقيق +حبة بصل صغيرة (اختياري) + 3 ملاعق ماييس نقطع حبة طماطم صغيرة (بصح نخليها مع الاخر باش نضيفها .
نقسم العجينة الى 4 كور . نكورهم ونتركهم يرتاحو2د ونبسطهم على طاولة العمل مرشوشة بالفرينة نرققها قدر الامكان
قيسو بحاجة مدورة على الشكل من بعد اذا حبيتو تحشو الخبز من داخل خلوها تخمر باش تطيبوها انا نطيبها مباشرة فوق طاجين على نار متوسطة وغير تبدى تدير فقاعات نقلبها ونعاود نقلبها حتى تبان بلي عجينة بيضاء ودخلها الطياب ننزعها بلا مانتركها تطيب بزاف
نحط مقلة تسخن مليح + ملعقة صغيرة زيت ونحط الدجاج يتحمر على نار قاوية بعد 7 د نضيف عليه الخضرة وطماطم نتركها حتى تنشف الصلصة وننزعها من فوق النار .
نرفد خبزة نبشر عليها الجبن +شوية حشو يكون ناشف نزيد عليه جبن مبشور ونغلق سندويتش ونحطو مباشرة فوق مقلة مدهونة بالزبدة فيها خطوط ونضع على سندويتش غطاء ونعبز عليه باشيجي محمر والجبن يذوب وندور السندويتش في المقله
باش الخطوط تجي متقاطعه والشكل يجي شباب نقلب السندويتش على الجهة الثانية يتحمر او يمكن استعمال panineuse من بعد نقطعو مثلثات ونقدمو مع سلطة .
